بياع هوا
الجمعة، 6 يوليو 2007
مين البطل ؟؟
ماتت قلوب الخلق لمَّا مات ضميرها وانعدمْ
وازّاي تعيش نقطة ضمير والحَق صوته بيتكتمْ
والدّين .. بقي سلعة رخيصة بتترمي
ويلملم الأشلاء لنا
اللي ما يفْهم في الشّرا
مين يشتري؟؟
جابوا الخواجَه لاجل يدْعم ضعفنا
احذف وعدّل يا خواجه زي ما سيادتك تعوز
احذف وعدّل في النصوصْ !
مش نصنا !
ده احنا غلابه ندفن في العيش نعيش
هاتوا المعونة البضايع لاجل يكتر قمحنا
يا حزننا
يا حزننا
كان النبي ديمًا يقول
سيدْنا دَاوُد كاتْ وكلته من صنعته
ومّا يشوف خط الفقير في اديه معلّم م الشّقيْ
كان يبتسم
ربَّك يحب العبد يشقي لاجل ياكل لقمته
يا امُ العِيَال الواد كبر
من كُتر لفُّه خلاص .. تِعب
شاف الطَّابور قلبه انخلع
جالكْ وشايل حسرته ما بين سُؤال
يا امُ العيَال
ايه راح يكون لو تنفتح أو تنكسرْ
كل المَبَادئ والقيمْ
ما الكل عايش بين سكون
عمَّال يدور
ساقية نهايتَك يا وطن
الكل فيها بيبتسم ويقول .. أنا
هو صحيح مين البطل ؟؟
اللي بينحَت في الجبل
ولَّا اللي راح ماتْ وانقتل
ولَّا اللي باع كلمة أمل من حَسْرته
ولَّا اللي راسم صرخته
تاااااه السؤال
مابين دُروب الاحتمال
ايه السبب إنّ احنا مشْ قادرين ناكَّل نفسنا؟؟
شاطرين أويْ وفي كُل مولد نحتفل
من أجل حبَّك يا نبي؟؟
من أجل حبَّك يا نبي؟؟
حــــب النبي مش كلمتين متلونين فوق الورق
ولا صرخة بين صمت الخلايق تنحرق
حب النبي إنك تضيف لدّنيا خير
وترجع الحلّم باديك .. لو يتسرق
********
0 Comments:
إرسال تعليق
<< Home